All wer as anners ook, de Klock schlooch un de Lü gung`n in`t Kark. Dr. Diefenbach spööl de Örgel, man dor wer keen Pastor und Karl-Heinz Ockenga wer Küster. De Plattdüütsk Kring Harlingerland har to`n plattdüütsken Gottesdeenst inladen un so wur good 75 Minütn bloot Platt in`t Kark snackt. Herta Daniels ut Weerm un hör Kolleg Willi Jacobs har`n dat vörbereit un Froo Daniels heet de Besökers denn ok hartlich willkamen. Pastor i.R. Jibbo-Edo Ahlrichs, de vörtied Pastor in Marx wer, föhr dör de Gottesdeenst. De Gitarrenkreis mit Else Doege spööl ok na`n poor Leeder tüschendör. In de Prädigt, de van 5 Minschen holln wur, dreih sük dat all üm de Leev. Nich bloot üm die Leev van Mann un Froo sünner üm die Leev to all Lü, to dat tosamenlebn un to Gott. Mit dat Vaderunser up platt gung de Gottesdeenst to En`n. Dorna stund in Karktoorm na betten wat to drinken und to knabbern üm dat man na mal mitnanner snakken kunn. Annemarie Janssen van`t Karkenvörstand hat dat torecht makt.
